Nortzuk gara?

Bor-bor Aiaraldeko feminismo elkartea eskualdean feminismoa euskaraz saretzeko sortua eragilea da. 2018. urtean ekin genion boluntarioz osaturiko lantaldea eratzeari. Geroztik, ekintza ugari egin ditugu bailaran. Auzolan eta elkarlana ardatz, ondorengo zeharlerroak jorratzen ditugu: koordinazioa, ahalduntzea, saretzea eta komunikazioa. Lau eremu horien baitan proiektuak euskaraz sortu eta sustatzen ditugu, eskualdeko norbanako zein talde feministak saretu eta ahalduntzeko. Gure eragite eremua ondorengoa da: Urduña, Amurrio, Artziniega, Aiara, Okondo, Laudio, Arrankudiaga-Zollo, Orozko eta Arakaldo. Beraz, Araba eta Bizkaiko lurraldeetan aritzen gara, egoitza soziala Laudion (Araban) badago ere.

Nola sortu zen? Feminismo ildoa Aiaraldea Kooperatiba Elkartearen balioei jarraiki eratu zen 2018an, ahalik eta 2020an elkarte bilakatzea erabaki zen arte, nahiz eta ofizialki 2022an erregistratu Elkarteen Erroldan. Ordutik, makina bat helburu eta egitasmo osatu ditugu, euskara eta feminismotik.

Helburuak

Feminismoa euskaraz jendarteratzeko baliabideak eskaintzea komunitateari

Gorputz, identitate, jatorri, ibilbide guztiei tokia egingo dien espazioak sortzea

Komunitate feminista eta euskalduna artikulatzea eta saretzea

Jarduera nagusiak

Ehun feminista saretzeko tresnak (koordinazioa) Saretzea Tokiko memoria historiko feminista pilatu eta zabaltzea Ahalduntzea

Ehun feminista saretzeko tresnak (koordinazioa)

2018an Feminismoa jorratzeko ildoa sortu zenetik, eskualdeko norbanako zein eragile feministak saretu eta ahalduntzeko tresnak sortu ditugu. Besteak beste, “Aiaraldeko eragile feministen topaketak”, Mugimendu Feministarekin koordinatzeko sortutako ‘Aiaraldeko Intranet Feminista’ eta bestelako ekimenak prestatu izan ditugu.

Saretzea

Feminismotik eta euskaratik ahaldundu eta saretzeko eratu zen gure proiektua. Zentzu horretan, saretzea izan da gure jarduera nagusietako bat (Feminismoa Aiaraldean jardunaldiaren ondorio izan zen egitasmo osoaren sorkuntza). Hala, Aiaraldeko emakumeen* topaketa feministak antolatu izan ditugu urtero formatu eta herri ezberdinetan, baita kulturartekotasuna jorratzeko beste hainbat proiektu eta jarduera ere.

Tokiko memoria historiko feminista pilatu eta zabaltzea

Mugimendu eta ekimen feministen jarraipena eta zabalkundea egiteko konpromisoa hartu genuen, halaber, 2022an (elkartea jaiotzearekin batera). Modu horretan, eskualdean urtero egindako lan guztia (baita Euskal Herri mailan gertatutakoen bilduma ere) BOR-BOR LIBURUXKAn pilatzen ditugu; tokiko memoriari ikuspegi eta bilakaera feminista ere gehitzeko. Horrez gain, tokiko memoria eta emakume* erreferenteen ezagutza zein lana aitortu eta sozializatzeko proiektuak burutu ditugu (Aiaraldeko Mugimendu Feministaren ikerketa eta dosierra kasu -gerora tribial digitala eta unitate didaktiko bilakatuko zena- edota ‘Aiaraldeko emakume* erreferenteak’ lan lerroari lotutako proiektuak bezala (mapa eta karta digitalak, esaterako).

Ahalduntzea

Arabako Foru Aldundiko zein Eusko Jaurlaritzako euskara  sustatzeko programen diru-laguntzei esker ahalduntzeari begira  hainbat solasaldi, ikastaro eta tailer antolatu ditu elkarteak 2022az  geroztik (Bor-bor Solasaldi Zikloa antolatzen da urtero, adibidez).  Horren adibide dira berdintasuna, kulturartekotasuna eta euskara  sustatzeko gauzatzen proiektuak.